Basit Bhopali
mere rone par kisi ki chashm giryan haa.e haa.e
vo gul-e-tar vo faza-e-shabnamistan haa.e haa.e
vo kisi ki yad-e-paiham sham-e-hijran haa.e haa.e
har nafas vaqf-e-nava-ha-e-pareshan haa.e haa.e
dil pe dard-e-ishq ka ek ek ehsan haa.e haa.e
jaan ki surat men koi dushman-e-jan haa.e haa.e
sub.h-e-hijran bad-tar-az-shab-ha-e-hijran haa.e haa.e
zindagi ik mustaqil ḳhvab-e-pareshan haa.e haa.e
dil ki rahat ke liye un ki mohabbat ke liye
koshish-e-be-sud phirta hadd-e-imkan haa.e haa.e
meri ḳhatir aur vo majburiyon ka e’tiraf
un ke nazuk dil ko bhi ehsas-e-hijran haa.e haa.e
kaifiyat-e-sajda-e-zauq-e-mohabbat al-aman
ka.aba-e-dil be-niyaz-e-kufr-o-iman haa.e haa.e
vo mira kaif-e-nazar vo be-ḳhudi vo sarḳhushi
fursat-e-nazzara-ha-e-husn-e-janan haa.e haa.e
un ki mahfil men bhi huun daman-kash-e-vahshat-ba-dil
har jagah ik alam-e-adab-e-zindan haa.e haa.e
yaas ki maujon men har manzar ka aḳhir Dubna
dil se vo uThta hua tufan-e-hirman haa.e haa.e
jo na samjhen dard kya hai dard ka ehsas kya
kab tak un ke vaste ‘basit’ ghazal-ḳhvan haa.e haa.e
Leave a Reply