chalti rahi us kuche men talvar hamesha
lashe hi nikalte rahe do-char hamesha
gil khulte rahen chahchahe karta rahe bulbul
ya-rab rahe abad ye gulzar hamesha
ham rind hue shahid-e-maqsud se vasil
jhagḌe men rahe kafir o din-dar hamesha
yaan tuḳhm-e-tamanna se uga karta hai laala
gul khate hain har fasl men do-char hamesha
taḌpa karen kuche men tire saikḌon kushte
rangin rahe ḳhuun se tiri talvar hamesha
divane hain maa.il hon agar hur-o-pari ke
jo dekh rahe huun tira didar hamesha
mujh tishna-e-didar ko kis roz chhakaya
pyasa hi raha ḳhuun ka vo ḳhunḳhar hamesha
mushtaqon ne tere na liya kauḌiyon ke mol
bikta raha yusuf sar-e-bazar hamesha
hai zulf-e-musalsal tiri ya dam-e-bala hai
ho rahte hain do-char giraftar hamesha
kyun-kar tu masiha hua mash.hur jahan men
marte hain tire haath se bimar hamesha
hangame na.e roz hua karte hain barpa
fitne hi uThati hai vo raftar hamesha
ai ‘rind’ junun men bhi na sahra ko ga.e ham
khaya kiye patthar sar-e-bazar hamesha
Leave a Reply