Aap Apna Ghubar The Hum To

aap apna ghubar the ham to

yaad the yadgar the ham to

pardagi ham se kyuun rakha parda

tere hi parda-dar the ham to

vaqt ki dhuup men tumhare liye

shajar-e-saya-dar the ham to

ude jaate hain dhuul ke manind

andhiyon par savar the ham to

ham ne kyuun ḳhud pe eatibar kiya

saḳht be-e’tibar the ham to

sharm hai apni baar baari ki

be-sabab baar baar the ham to

kyuun hamen kar diya gaya majbur

ḳhud hi be-iḳhtiyar the ham to

tum ne kaise bhula diya ham ko

tum se hi mustaar the ham to

ḳhush na aaya hamen jiye jaana

lamhe lamhe pe baar the ham to

sah bhi lete hamare taanon ko

jan-e-man jan-nisar the ham to

ḳhud ko dauran-e-hal men apne

be-tarah nagavar the ham to

tum ne ham ko bhi kar diya barbad

nadir-e-rozgar the ham to

ham ko yaron ne yaad bhi na rakha

‘jaun’ yaron ke yaar the ham to

Leave a Comment