Arsh Malsiyani
hain aise bad-havas hujum-e-bala se ham
apna samajh ke milte hain har ashna se ham
tufan se ulajh ga.e le kar ḳhuda ka naam
aḳhir najat pa hi ga.e naḳhuda se ham
pahla sa vo junun-e-mohabbat nahin raha
kuchh kuchh sambhal ga.e hain tumhari dua se ham
yuun mutma.in se aa.e hain kha kar jigar pe choT
jaise vahan ga.e the isi mudda.a se ham
aane do iltifat men kuchh aur bhi kami
manus ho rahe hain tumhari jafa se ham
ḳhu-e-vafa mili dil-e-dard-ashna mila
kya rah gaya hai aur jo na mangen ḳhuda se ham
aadat si ho ga.i hai shikayat ki hamen
bezar to nahin hain tumhari jafa se ham
pa-e-talab bhi tez tha manzil bhi thi qarib
lekin najat pa na sake rahnuma se ham
duniya se kuchh lagao na uqba ki aarzu
tang aa ga.e hain is dil-e-be-mudda.a se ham
hote nashat-e-ishq se bhi faizyab ‘arsh’
majbur hain magar dil-e-gham-ashna se ham
Leave a Reply