mushkilen kitni hain poshida is asani men
sona paḌta hai hamen ḳhvab ki nigarani men
ḳhud se milna ho to fursat ke palon men milna
aks dikhte hi nahin bahte hue paani men
ba.ad muddat ke mila tha vo magar tha kaisa
dekhna bhuul gaya us ko main hairani men
teri yaad aa.i to hairat bhi nahin hai mujh ko
yaad apna hi to aata hai pareshani men
kya hua jis ne yaqin ko tire mismar kiya
tu ne kya dekh liya lamha-e-imkani men
Leave a Reply