Kisi Se Bas Ki Umid-E-Kushud-E-Kar Nahin

Nazm Tabatabai

kisi se bas ki umid-e-kushud-e-kar nahin

mujhe ajal ke bhi aane ka e’tibar nahin

javab naame ka qasid mazar par laaya

ki janta tha use tab-e-intizar nahin

ye kah ke uTh ga.i balin se meri sham-e-sahar

tamam ho ga.i shab aur tujhe qarar nahin

jo tu ho paas to hur-o-qusur sab kuchh ho

jo tu nahin to nahin balki zinhar nahin

ḳhizan ke aane se pahle hi tha mujhe ma.alum

ki rang-o-bu-e-chaman ka kuchh e’tibar nahin

ghazal kahi hai ki moti piro.e hain ai ‘nazm’

vo kaun sher hai jo durr-e-shahvar nahin