Meri Jaan Judai Na Hogi To Hogi

miri jaan judai na hogi to hogi

kisi din ladai na hogi to hogi

unhen sharm hai aur yahan shauq-e-behad

agar hatha-pai na hogi to hogi

nahin itni jurat ki qadmon pe girye

ki un se safai na hogi to hogi

zara jazba-e-dil madad kar khudara

jo un tak rasai na hogi to hogi

na kuchh husn o khubi men farq aaya hoga

ye daulat lutai na hogi to hogi

rihai asir-e-mohabbat ko tere

agar maut aai na hogi to hogi

nae zulm ijad karte raho tum

jahan men duhai na hogi to hogi

nahin baak ghairon se milne men un ko

jo dil men burai na hogi to hogi

har ik baat par afrin jab kahen sab

to phir khud-satai na hogi to hogi

mohabbat ki jo aankh thi aage teri

jo tu ne churai na hogi to hogi

mohabbat ka gar khul gaya haal un par

to ‘anjum’ rukhai na hogi to hogi

Leave a Comment