kanar-e-ab tire pairahan badalne ka
miri nigah men manzar hai shaam Dhalne ka
ye kaisi aag hai mujh men ki ek muddat se
tamasha dekh raha huun main apne jalne ka
suna hai ghar pe mira muntazir nahin koi
so ab ke baar main hargiz nahin sambhalne ka
ḳhud apni zaat pe markuz ho gaya huun main
ki hausla hi nahin tere saath chalne ka
ab aa ga.e ho to phir umr bhar yahin Thahro
badan se koi bhi rasta nahin nikalne ka
‘salim’ sham-e-vajud aa ga.i hai bujhne par
bas intizar karo mom ke pighalne ka
Leave a Reply