Irfana Azeez
charagh-e-fikr jalaya hai raat bhar ham ne
aur us ke ba.ad nikhara ruḳh-e-sahar ham ne
hamen shu.ur ne dhoke diye hain rah rah kar
fareb khaa.e hain danista beshtar ham ne
sila ḳhirad ka zamane men jam-e-zahr sahi
nikhar di hai magar azmat-e-bashar ham ne
nazar ho daulat-e-har-do-jahan pe kya maa.il
sameT li hai bahut daulat-e-nazar ham ne
sada-e-pa ki suni baz-gasht hi har gaam
talash ki hai jahan teri rahguzar ham ne
nigar-e-gul ne liya naam zer-e-lab tera
udaas chand ko dekha pas-e-shajar ham ne
Leave a Reply