Ghulam Murtaza Rahi
ubal paḌa yak-ba-yak samundar to main ne dekha
khula jo raz-e-sukut lab par to main ne dekha
utar gaya rang-e-ru-e-manzar to main ne dekha
haTi nigah-e-bahar yaksar to main ne dekha
na jaane kab se vo andar andar sulag raha tha
mila jo divar men mujhe dar to main ne dekha
tamam gard-o-ghubar dil se nikal chuka tha
baras chuka abr-e-ashk khul kar to main ne dekha
nishan qadmon ke raste men chamak rahe the
guzar gaya vo nazar bacha kar to main ne dekha
mila ke miTTi men rakh di us ne ibadat us ki
jo mere aage na ḳham kiya sar to main ne dekha
Leave a Reply