Anjum Khaleeq
ham apne zauq-e-safar ko safar sitara karen
na koi za.icha khinchen na istiḳhara karen
usi se lafz bane maan bhi ek hai jin men
to kaise harf ki be-hurmati gavara karen
usi sharar ko jo ik ahd-e-yas ne baḳhsha
kabhi diya kabhi jugnu kabhi sitara karen
shu.ur-e-sher ne vo aankh khol di dil men
ki ab to ham pas-e-imkan bhi nazara karen
firaq-rut men bhi kuchh lazzaten visal ki hain
ḳhayal hi men tire ḳhal-o-ḳhad ubhara karen
ilahi khol de ham par dar-e-madina-e-ilm
ali ali isi ummid par pukara karen
asa nahin na sahi ham faqir log magar
hon mauj men to talatum ko hi kinara karen
ḳhuda ka shukr hai sab zar-pasand jah-talab
hamari sohbat-e-be-faiz se kinara karen
mile jo vaqt to ‘anjum’ ba-surat-e-divan
murattab apni riyazat ka goshvara karen
Leave a Reply