Jawab-E-Shikwa

dil se jo baat nikalti hai asar rakhti hai

par nahin taqat-e-parvaz magar rakhti hai

qudsi-ul-asl hai rifat pe nazar rakhti hai

ḳhaak se uthti hai gardun pe guzar rakhti hai

ishq tha fitnagar o sarkash o chalak mira

asman chiir gaya nala-e-bebak mira

pir-e-gardun ne kaha sun ke kahin hai koi

bole sayyare sar-e-arsh-e-barin hai koi

chand kahta tha nahin ahl-e-zamin hai koi

kahkashan kahti thi poshida yahin hai koi

kuchh jo samjha mire shikve ko to rizvan samjha

mujh ko jannat se nikala hua insan samjha

thi farishton ko bhi hairat ki ye avaz hai kya

arsh valon pe bhi khulta nahin ye raaz hai kya

ta-sar-e-arsh bhi insan ki tag-o-taz hai kya

aa gai ḳhaak ki chutki ko bhi parvaz hai kya

ghafil adab se sukkan-e-zamin kaise hain

shoḳh o gustaḳh ye pasti ke makin kaise hain

is qadar shoḳh ki allah se bhi barham hai

tha jo masjud-e-malaik ye vahi aadam hai

alim-e-kaif hai dana-e-rumuz-e-kam hai

haan magar ijz ke asrar se na-mahram hai

naaz hai taqat-e-guftar pe insanon ko

baat karne ka saliqa nahin na-danon ko

aai avaz gham-angez hai afsana tira

ashk-e-betab se labrez hai paimana tira

asman-gir hua nara-e-mastana tira

kis qadar shoḳh-zaban hai dil-e-divana tira

shukr shikve ko kiya husn-e-ada se tu ne

ham-suḳhan kar diya bandon ko ḳhuda se tu ne

ham to mail-ba-karam hain koi saail hi nahin

raah dikhlaen kise rah-rav-e-manzil hi nahin

tarbiyat aam to hai jauhar-e-qabil hi nahin

jis se taamir ho aadam ki ye vo gil hi nahin

koi qabil ho to ham shan-e-kai dete hain

DhunDne valon ko duniya bhi nai dete hain

haath be-zor hain ilhad se dil ḳhugar hain

ummati bais-e-rusvai-e-paighambar hain

but-shikan uth gae baaqi jo rahe but-gar hain

tha brahim pidar aur pisar aazar hain

bada-asham nae baada naya ḳhum bhi nae

haram-e-kaba naya but bhi nae tum bhi nae

vo bhi din the ki yahi maya-e-ranai tha

nazish-e-mausam-e-gul lala-e-sahrai tha

jo musalman tha allah ka saudai tha

kabhi mahbub tumhara yahi harjai tha

kisi yakjai se ab ahd-e-ghulami kar lo

millat-e-ahmad-e-mursil ko maqami kar lo

kis qadar tum pe giran sub.h ki bedari hai

ham se kab pyaar hai haan niind tumhen pyari hai

tab-e-azad pe qaid-e-ramazan bhari hai

tumhin kah do yahi ain-e-vafadari hai

qaum maz.hab se hai maz.hab jo nahin tum bhi nahin

jazb-e-baham jo nahin mahfil-e-anjum bhi nahin

jin ko aata nahin duniya men koi fan tum ho

nahin jis qaum ko parva-e-nasheman tum ho

bijliyan jis men hon asuda vo ḳhirman tum ho

bech khate hain jo aslaf ke madfan tum ho

ho niko naam jo qabron ki tijarat kar ke

kya na bechoge jo mil jaaen sanam patthar ke

safha-e-dahr se batil ko mitaya kis ne

nau-e-insan ko ghulami se chhudaya kis ne

mere kaabe ko jabinon se basaya kis ne

mere quran ko sinon se lagaya kis ne

the to aaba vo tumhare hi magar tum kya ho

haath par haath dhare muntazir-e-farda ho

kya kaha bahr-e-musalman hai faqat vada-e-hur

shikva beja bhi kare koi to lazim hai shu.ur

adl hai fatir-e-hasti ka azal se dastur

muslim aaiin hua kafir to mile huur o qusur

tum men huron ka koi chahne vaala hi nahin

jalva-e-tur to maujud hai muusa hi nahin

manfaat ek hai is qaum ka nuqsan bhi ek

ek hi sab ka nabi diin bhi iman bhi ek

haram-e-pak bhi allah bhi quran bhi ek

kuchh badi baat thi hote jo musalman bhi ek

firqa-bandi hai kahin aur kahin zaten hain

kya zamane men panapne ki yahi baten hain

kaun hai tarik-e-ain-e-rasul-e-muḳhtar

maslahat vaqt ki hai kis ke amal ka meaar

kis ki ankhon men samaya hai shiar-e-aghyar

ho gai kis ki nigah tarz-e-salaf se be-zar

qalb men soz nahin ruuh men ehsas nahin

kuchh bhi paigham-e-mohammad ka tumhen paas nahin

ja ke hote hain masajid men saf-ara to gharib

zahmat-e-roza jo karte hain gavara to gharib

naam leta hai agar koi hamara to gharib

parda rakhta hai agar koi tumhara to gharib

umara nashsha-e-daulat men hain ghafil ham se

zinda hai millat-e-baiza ghoraba ke dam se

vaiz-e-qaum ki vo puḳhta-ḳhayali na rahi

barq-e-tabi na rahi shola-maqali na rahi

rah gai rasm-e-azan ruh-e-bilali na rahi

falsafa rah gaya talqin-e-ghazali na rahi

masjiden marsiyan-ḳhvan hain ki namazi na rahe

yaani vo sahib-e-ausaf-e-hijazi na rahe

shor hai ho gae duniya se musalman nabud

ham ye kahte hain ki the bhi kahin muslim maujud

vaza men tum ho nasara to tamaddun men hunud

ye musalman hain jinhen dekh ke sharmaen yahud

yuun to sayyad bhi ho mirza bhi ho afghan bhi ho

tum sabhi kuchh ho batao to musalman bhi ho

dam-e-taqrir thi muslim ki sadaqat bebak

adl us ka tha qavi laus-e-maraat se paak

shajar-e-fitrat-e-muslim tha haya se namnak

tha shujaat men vo ik hasti-e-fauq-ul-idrak

ḳhud-gudazi nam-e-kaifiyat-e-sahba-yash buud

ḳhali-az-ḳhesh shudan surat-e-mina-yash buud

har musalman rag-e-batil ke liye nashtar tha

us ke aina-e-hasti men amal jauhar tha

jo bharosa tha use quvvat-e-bazu par tha

hai tumhen maut ka Dar us ko ḳhuda ka Dar tha

baap ka ilm na bete ko agar azbar ho

phir pisar qabil-e-miras-e-pidar kyunkar ho

har koi mast-e-mai-e-zauq-e-tan-asani hai

tum musalman ho ye andaz-e-musalmani hai

haidari faqr hai ne daulat-e-usmani hai

tum ko aslaf se kya nisbat-e-ruhani hai

vo zamane men muazziz the musalman ho kar

aur tum ḳhvar hue tarik-e-quran ho kar

tum ho aapas men ghazabnak vo aapas men rahim

tum ḳhata-kar o ḳhata-bin vo ḳhata-posh o karim

chahte sab hain ki hon auj-e-surayya pe muqim

pahle vaisa koi paida to kare qalb-e-salim

taḳht-e-faghfur bhi un ka tha sarir-e-kae bhi

yuun hi baten hain ki tum men vo hamiyat hai bhi

ḳhud-kushi sheva tumhara vo ghayur o ḳhuddar

tum uḳhuvvat se gurezan vo uḳhuvvat pe nisar

tum ho guftar sarapa vo sarapa kirdar

tum taraste ho kali ko vo gulistan ba-kanar

ab talak yaad hai qaumon ko hikayat un ki

naqsh hai safha-e-hasti pe sadaqat un ki

misl-e-anjum ufuq-e-qaum pe raushan bhi hue

but-e-hindi ki mohabbat men birhman bhi hue

shauq-e-parvaz men mahjur-e-nasheman bhi hue

be-amal the hi javan diin se bad-zan bhi hue

in ko tahzib ne har band se azad kiya

la ke kaabe se sanam-ḳhane men abad kiya

qais zahmat-kash-e-tanhai-e-sahra na rahe

shahr ki khaae hava badiya-paima na rahe

vo to divana hai basti men rahe ya na rahe

ye zaruri hai hijab-e-ruḳh-e-laila na rahe

gila-e-zaur na ho shikva-e-bedad na ho

ishq azad hai kyuun husn bhi azad na ho

ahd-e-nau barq hai atish-zan-e-har-ḳhirman hai

aiman is se koi sahra na koi gulshan hai

is nai aag ka aqvam-e-kuhan indhan hai

millat-e-ḳhatm-e-rusul shola-ba-pairahan hai

aaj bhi ho jo brahim ka iman paida

aag kar sakti hai andaz-e-gulistan paida

dekh kar rang-e-chaman ho na pareshan maali

Kaukab-e-ghuncha se shaḳhen hain chamakne vaali

ḳhas o ḳhashak se hota hai gulistan ḳhali

ghul-bar-andaz hai ḳhun-e-shohda ki laali

rang gardun ka zara dekh to unnabi hai

ye nikalte hue suraj ki ufuq-tabi hai

ummaten gulshan-e-hasti men samar-chida bhi hain

aur mahrum-e-samar bhi hain ḳhizan-dida bhi hain

saikdon naḳhl hain kahida bhi balida bhi hain

saikdon batn-e-chaman men abhi poshida bhi hain

naḳhl-e-islam namuna hai birau-mandi ka

phal hai ye saikdon sadiyon ki chaman-bandi ka

paak hai gard-e-vatan se sar-e-daman tera

tu vo yusuf hai ki har misr hai kanan tera

qafila ho na sakega kabhi viran tera

ghair yak-bang-e-dara kuchh nahin saman tera

naḳhl-e-shama asti o dar shola do-resha-e-tu

aqibat-soz bavad saya-e-andesha-e-tu

tu na mit jaega iran ke mit jaane se

nashsha-e-mai ko taalluq nahin paimane se

hai ayaan yurish-e-tatar ke afsane se

pasban mil gae kaabe ko sanam-ḳhane se

kashti-e-haq ka zamane men sahara tu hai

asr-e-nau-rat hai dhundla sa sitara tu hai

hai jo hangama bapa yurish-e-bulghari ka

ghafilon ke liye paigham hai bedari ka

tu samajhta hai ye saman hai dil-azari ka

imtihan hai tire isar ka ḳhuddari ka

kyuun hirasan hai sahil-e-faras-e-ada se

nur-e-haq bujh na sakega nafas-e-ada se

chashm-e-aqvam se maḳhfi hai haqiqat teri

hai abhi mahfil-e-hasti ko zarurat teri

zinda rakhti hai zamane ko hararat teri

kaukab-e-qismat-e-imkan hai ḳhilafat teri

vaqt-e-fursat hai kahan kaam abhi baaqi hai

nur-e-tauhid ka itmam abhi baaqi hai

misl-e-bu qaid hai ghunche men pareshan ho ja

raḳht-bar-dosh hava-e-chamanistan ho ja

hai tunak-maya tu zarre se bayaban ho ja

naghma-e-mauj hai hangama-e-tufan ho ja

quvvat-e-ishq se har past ko baala kar de

dahr men ism-e-mohammad se ujala kar de

ho na ye phuul to bulbul ka tarannum bhi na ho

chaman-e-dahr men kaliyon ka tabassum bhi na ho

ye na saaqi ho to phir mai bhi na ho ḳhum bhi na ho

bazm-e-tauhid bhi duniya men na ho tum bhi na ho

ḳhema-e-aflak ka istada isi naam se hai

nabz-e-hasti tapish-amada isi naam se hai

dasht men daman-e-kohsar men maidan men hai

bahr men mauj ki aghosh men tufan men hai

chiin ke shahr maraqash ke bayaban men hai

aur poshida musalman ke iman men hai

chashm-e-aqvam ye nazzara abad tak dekhe

rifat-e-shan-e-rafana-laka-zikrak dekhe

mardum-e-chashm-e-zamin yaani vo kaali duniya

vo tumhare shohda palne vaali duniya

garmi-e-mehr ki parvarda hilali duniya

ishq vaale jise kahte hain bilali duniya

tapish-andoz hai is naam se paare ki tarah

ghota-zan nuur men hai aankh ke taare ki tarah

aql hai teri sipar ishq hai shamshir tiri

mire darvesh ḳhilafat hai jahangir tiri

ma-siva-allah ke liye aag hai takbir tiri

tu musalman ho to taqdir hai tadbir tiri

ki mohammad se vafa tu ne to ham tere hain

ye jahan chiiz hai kya lauh-o-qalam tere hain

Leave a Comment