bahar aai hai mastana ghata kuchh aur kahti hai
magar un shokh nazron ki haya kuchh aur kahti hai
rihai ki khabar kis ne udaai sehn-e-gulshan men
asiran-e-qafas se to saba kuchh aur kahti hai
bahut khush hai dil-e-nadan hava-e-ku-e-janan men
magar ham se zamane ki hava kuchh aur kahti hai
tu mere dil ki sun aghosh ban kar kah raha hai kuchh
tiri nichi nazar to jaane kya kuchh aur kahti hai
miri janib se kah dena saba lahore valon se
ki is mausam men dehli ki hava kuchh aur kahti hai
hui muddat ke mai-noshi se tauba kar chuke ‘akhtar’
magar dehli ki mastana faza kuchh aur kahti hai
Leave a Reply