Aqeel Shah
ḳhamida raah ko sidha ghalat bataya hai
kisi ne andhon ko rasta ghalat bataya hai
zarur chor tha is marne vaale ke dil men
tabhi ḳhazane ka naqsha ghalat bataya hai
main ek baat batata magar buzurgon ne
har ek baat batana ghalat bataya hai
yahan pe rahta nahin koi qais naam ka shaḳhs
kisi ne aap ko sahra ghalat bataya hai
ye ziist vaqa.i mushkil hai ya mujhe dil ne
guzarne ka tariqa ghalat bataya hai
hamari dar-badari kyuun pasand hai us ko
na-jane kyuun pata apna ghalat bataya hai
jadid daur ke darvesh hain ‘aqil’ hamin
harif ne sag-e-duniya ghalat bataya hai
Leave a Reply