Etibar Sajid
tark-e-taalluq kar to chuke hain ik imkan abhi baaqi hai
ek mahaz se laut aae hain ik maidan abhi baaqi hai
shayad us ne hansi hansi men tark-e-vafa ka zikr kiya ho
yunhi si ik khush-fahmi hai itminan abhi baaqi hai
raten us ke hijr men ab bhi nazaa ke aalam men katti hain
dil men vaisi hi vahshat hai tan men jaan abhi baaqi hai
bachpan ke is ghar ke saare kamre maliya-met hue
jis men ham khela karte the vo dalan abhi baaqi hai
diye munder pa rakh aate hain ham har shaam na jaane kyuun
shayad us ke laut aane ka kuchh imkan abhi baaqi hai
ek adalat aur hai jis men ham tum ik din hazir honge
faisla sun kar khush mat hona ik mizan abhi baaqi hai
Leave a Reply