la-makan-o-makan bolta hai
jaise saara jahan bolta hai
kyon hain ahl-e-zaban mohr-ba-lab
kya koi be-zaban bolta hai
koi sunta nahin kisi ki har ik
apni apni zaban bolta hai
laakh gard-e-safar rahe ḳhamosh
rahguzar ka nishan bolta hai
saari mahfil dhuan dhuan si hui
kaun sho.ala-bayan bolta hai
ḳhushk dharti bhi chup nahin rahti
jab kabhi asman bolta hai
vahm hai ik umid-e-sub.h-e-tarab
mujh se mera guman bolta hai
asman tak hai gosh-bar-avaz
kaun ye darmiyan bolta hai
rang-e-ruḳh be-zaban sahi ‘at.har’
dil ka hai tarjuman bolta hai
Leave a Reply