Karamat Bukhari
milne ki jab baat hui thi
tanha.i bhi paas khaḌi thi
ankhon men tufan aaya tha
dil ki basti Duub ga.i thi
main ki tere dhyan men gum tha
duniya mujh ko DhunDh rahi thi
ham donon ḳhamosh khaḌe the
savan ki pur-zor jhaḌi thi
koson duur mujhe jaana tha
paanv men zanjir paḌi thi
tum se juda.i ka kya rona
ye to qismat men likkhi thi
ḳhvabon ke ik shahzade se
niind ki devi ruuTh ga.i thi
saari umr sulagte guzri
main tha ya giili lakḌi thi
Leave a Reply