kaise janun ki jahan ḳhvab-numa hota hai
jabki har shaḳhs yahan abla-pa hota hai
dekhne valon ki a.ankhon men nami tairti hai
sochne valon ke siine men ḳhala hota hai
log us shahr ko ḳhush-hal samajh lete hain
raat ke vaqt bhi jo jaag raha hota hai
ghar ke baare men yahi jaan saka huun ab tak
jab bhi lauTo koi darvaza khula hota hai
fasle is tarah simTe hain na.i duniya men
apne logon se har ik shaḳhs juda hota hai
mere muhtaj nahin hain ye badalte mausam
maan leta huun magar dil bhi bura hota hai
chandni raat ne ehsas dilaya hai ‘malal’
aadmi kitne sarabon men ghira hota hai
Leave a Reply