ye raat aḳhiri lori sunane vaali hai
main thak chuka huun mujhe niind aane vaali hai
hansi mazaq ki baten yahin pe ḳhatm huiin
ab is ke ba.ad kahani rulane vaali hai
akela main hi nahin ja raha huun basti se
ye raushni bhi mire saath jaane vaali hai
jo naqsh ham ne bana.e the sirf vo hi nahin
hava-e-dasht hamen bhi miTane vaali hai
abhi to koi bhi nam-o-nishan nahin us ka
hamen jo mauj kinare lagane vaali hai
har ek shaḳhs ka ye haal hai ki jaise yahan
zamin aḳhiri chakkar lagane vaali hai
Leave a Reply