Asar Itna to Ho Ya-Rab Hamare Jazba-E-Dil Ka

Shifa Gwaliari

asar itna to ho ya-rab hamare jazba-e-dil ka

baghair-e-iltija parda ulaT de koi mahmil ka

jo tum chaho badal jaa.e abhi naqsha mire dil ka

tumhen mushkil nahin asan karna meri mushkil ka

ḳhuda jaane ye kis ka ḳhun-e-nahaq rang laaya hai

har aansu surḳh hai jo bah raha hai sham-e-mahfil ka

mujhi se kya hai mere ansuon ke muntazir kya ho

zara tum hi palaT do muskura kar rang mahfil ka

samajh baiThe sukun-e-arzi ko mustaqil rahat

na kyon matam karun main ishrat-e-yaran-e-sahil ka

koi dozaḳh bana.enge ki vo jannat bana.enge

ḳhuda jaane karenge kya miri ḳhakistar-e-dil ka

‘shifa’ ye kasr-e-shan-e-zauq tauhin-e-nazara hai

ki un ko dekh kar kya dekhna phir mah-e-kamil ka