Khawaja Javed Akhtar
maujon ka shor-o-shar hai barabar laga hua
dariya se is qadar hai mira ghar laga hua
aisa na ho ki TuuT paḌe sar pe asman
hai kuchh dinon se mujh ko baḌa Dar laga hua
ab us ke shar se ḳhud ko bachana bhi hai mujhe
rahta hai mere saath jo aksar laga hua
had chhu rahi thi raat jahan tishnagi miri
tha us ke ba.ad ek samundar laga hua
sannaTe chiḳhte hain mire char-su magar
dil men hai iztirab ka mahshar laga hua
dushman ki baat chhoḌiye hairat hai ḳhud mujhe
gardan se aaj bhi hai mira sar laga hua
takta huun be-qarar nigahon se baar baar
hai asman se mera kabutar laga hua
Leave a Reply