Charkh Ki Sai-e-Jafa Koshish Nakara Hai

charḳh ki sai-e-jafa koshish nakara hai

gardish-e-dahr yahan jumbish-e-gahvara hai

chand taron ke talatum se ye aata hai ḳhayal

dil-e-vahshi koi tufan-zada sayyara hai

bah gae dida-e-nam-nak se dariya lekin

dil vahi ek dahakta hua angara hai

dil hua soz-e-jahannam men giraftar magar

ruuh ab bhi kisi firdaus men avara hai

kaisi taqdir ki gardish gham-e-dil ko main ne

gardish-e-gumbad-e-aflak pe de maara hai

mere sheron se ta.arruz na kar ai naqid-e-fan

meri barbadi-e-dil hi mira shah-para hai

bahjat-e-fikr pe qadir huun main jab tak ‘aḳhtar’

mujhe sarmaya-e-andoh bahut pyara hai

Leave a Comment