mujhe vo shaḳhs qalandar dikha.i deta hai
jo mere ḳhvab ke andar dikha.i deta hai
ye lag raha hai mira shahr chhoḌ ja.ega
vo aj-kal mujhe aksar dikha.i deta hai
to kya ye maan luun main asman se uupar huun
har ik sitara zamin par dikha.i deta hai
jo samne hai sarihan nazar ka hai dhoka
vo hai nahin jo barabar dikha.i deta hai
tumhari aankh men dekha hai sab ne dasht magar
mujhe to un men samundar dikha.i deta hai
Leave a Reply