un ki ara.ish se mere kaam ban ja.enge kya
dil ki gutthi shana-ha-e-zulf suljha.enge kya
vasl ke va.ade se ḳhush ho kar na mar ja.enge kya
nama-bar hansta hua aata hai ḳhud a.enge kya
qaidi-e-gham turbaton men aur un ko ye ḳhayal
kaTne men ik shab-e-furqat ke mar ja.enge kya
kaam apna kar chuke ahl-e-vafa shak hai to ho
sar nahin baaqi shahidon ke qasam kha.enge kya
arz-e-matlab ke liye ai dil zaban khulti nahin
kuchh ishare main karunga vo samajh ja.enge kya
haath idhar uThta nahin hai taar udhar baaqi nahin
denge vo kya aur ham daman ko phaila.enge kya
qissa-e-farhad-o-majnun kyuun sunate ho hamen
jab pareshani se matlab hai to ghabra.en kya
mehman-e-ku-e-janan ho ke dil betab hai
main to samjhata nahin vo bhi na samjha.enge kya
mast rahte hain hamesha mai-faroshan-e-jamal
ham to mangenge koi saghar vo farma.enge kya
kyuun na chup baiThun qafas men duur hi fasl-e-bahar
ah-o-zari se miri mausam badal ja.enge kya
tinke tinke ka ḳhuda-hafiz chale ham baagh se
alvida.a ai ashiyan ab ja ke phir a.enge kya
dil ki bimari ka uqda kholna dushvar hai
jo nahin samjhe vo ‘saqib’ mujh ko samjha.enge kya
Leave a Reply