Poet
sar-sar gesu hila rahi hai
sar par kaale khila rahi hai
furqat men khuun rula rahi hai
taqdir ye rang la rahi hai
daghon se dil jala rahi hai
ulfat sikke bitha rahi hai
daman men hai tere bu-e-kakul
kyuun mujh ko saba uda rahi hai
hal-e-tap-e-hijr kuchh na puchho
dil kha chuki jaan kha rahi hai
jheli hui hai jafa tabiat
barson hi mubtala rahi hai
kisra mahal na taq-e-jam hai
ai dil kis ki sada rahi hai
marta hai dil buton ke uupar
taqdir pahad dha rahi hai
tifli-o-javani khuub guzri
do din achchhi hava rahi hai
udti hai khaak us jagah par
barson jis ja faza rahi hai
ye bint-e-inab bahar-e-gul men
yaron ki bhi ashna rahi hai
laati nahin bu-e-yar nighat
us dil ki lagi bujha rahi hai
ham bhi the kabhi javan raana
apni bhi kabhi hava rahi hai
khulta nahin haal gul ka bulbul
shabnam paani chua rahi hai
ye fasl-e-bahar be-khudi ka
rasta ham ko bata rahi hai
gulshan men urus-e-gul ke uupar
shabnam moti luta rahi hai
phule nahin gul chaman ke andar
vahshat ankhen dikha rahi hai
fiqre se le aae us sanam ko
kyuun ‘muntahi’ baat kya rahi hai
Leave a Reply