Sahir Dehlavi
nur-e-iman surma-e-chashm-e-dil-o-jan kijiye
parda-dar-e-husn-e-yakta chashm-e-hairan kijiye
mushkilat-e-rah ko himmat se asan kijiye
tai fana ki manzilen uftan-o-ḳhizan kijiye
be-hijabana ḳhud-ara.i ke saman kijiye
maz.har-e-shan-e-tajalli bazm-e-imkan kijiye
hain man-o-tu jalva-e-ha-e-husn-e-vahdat ka hijab
sham-e-bazm-e-ḳhud-shanasi nur-e-irfan kijiye
jalva-ha-e-tur ki takrar ya tajdid ho
lan-tarani se masavi kufr-o-iman kijiye
shirk gar manzur hai aur hai anal-haq na-qubul
daar par mansur ko khichva.iye haan kijiye
ḳhud-numa.i naaz hai andaz ḳhud-ara.iyan
jalva-e-jan se munavvar qalb-e-insan kijiye
kaif-e-masti men ki irfan-e-junun men al-gharaz
va har ik band-e-naqab-e-ru-e-janan kijiye
kar diya rahmat ne nurani mira zulmat-kada
nosh-e-jan jam-e-safa se ab-e-haivan kijiye
rahravan-e-jada-e-ishq-o-fana mansur hain
arzu-ha-e-do-alam un pe qurban kijiye
ham hain hindi aur hamara mulk hai hindostan
hind men paida tasavvuf ke zaban-dan kijiye
mastiyan ‘sahir’ ki hain jam-e-mai-e-tauhid se
ho sake to aise kafir ko musalman kijiye
Leave a Reply