sham-e-gham aaj zara aise mana li jaa.e
be-sabab ek ghazal aur suna li jaa.e
hakim-e-vaqt ko dekhun to dua karta huun
itni izzat de ḳhuda jitni sanbhali jaa.e
mere maula vo ḳhasare ke siva kuchh bhi nahin
har vo lamha jo tiri yaad se ḳhali jaa.e
gar mire haath men aa jaa.e aladin ka charagh
ghar ka mazdur koi haath na ḳhali jaa.e
had se bhi baḌh ke zaruri hai dua.en karna
aur is se bhi zaruri hai dua li jaa.e
puchhta kya hai kama.i ka tire shahr men dost
ye bhi daulat hai ki izzat hi bacha li jaa.e
aao sajde men karen baat ‘mubarak’ us se
jis ke dar se na koi ḳhali savali jaa.e
Leave a Reply