atish-e-bagh aise bhadki hai ki jalti hai hava
kucha-e-gul se dhuan ho kar nikalti hai hava
soz-e-vahshat men dhuen ki shakl kahish hai mujhe
main hava khata nahin mujh ko nigalti hai hava
dam agar nikla badan se phir badi taskin hai
khaak patthar ho ke jamti hai jo talti hai hava
giryae-e-ushshaq se kichad hai aise ja-ba-ja
thaam kar divar-o-dar galiyon men chalti hai hava
ja-ba-ja mujh ko liye phirti hai duniya ki havas
baith jaata hai bagula jab nikalti hai hava
gulshan-e-alam ki nairangi se hota hai yaqin
phir shagufa phulta hai phir badalti hai hava
hain bhi aahen to munh se bahar aata hai jigar
zarre ko rauzan se aksar le nikalti hai hava
nazuki men shakh-e-gul hai sarv-e-bala yaar ka
jhonke leta hai jo ahista bhi chalti hai hava
khaak udti hi jo us ke paanv se gul-gasht men
phulon ke munh par bajae ghaza malti hai hava
dekhiye chal kar zara kaifiyyat-e-josh-e-bahar
jhumte hain ped gir gir kar sambhalti hai hava
na-rasai dekhna udta hai jab mera ghubar
yaar ke kothe ke kanis se phisalti hai hava
garmiyon men sair gulzaron ki bhati hai mujhe
har qadam par pankhiya phulon ki jhalti hai hava
khaar kahte hain utha kar ungliyan gul ki taraf
phuul jaate hain vo kaisa jin ko phalti hai hava
sarv-e-qirtas-e-muqarriz huun main is gulzar men
khaak men paani milata hai masalti hai hava
‘bahr’ pankha haath se rakh do nihayat zaar huun
mauj-e-dariya ki tarah mujh ko kuchalti hai hava