bhuli hui sada huun mujhe yaad kijiye
tum se kahin mila huun mujhe yaad kijiye
manzil nahin huun ḳhizr nahin rahzan nahin
manzil ka rasta huun mujhe yaad kijiye
meri nigah-e-shauq se har gul hai devta
main ishq ka ḳhuda huun mujhe yaad kijiye
naghmon ki ibtida thi kabhi mere naam se
ashkon ki intiha huun mujhe yaad kijiye
gum-sum khaḌi hain donon jahan ki haqiqaten
main un se kah raha huun mujhe yaad kijiye
‘saghar’ kisi ke husn-e-taghaful-shi.ar ki
bahki hui ada huun mujhe yaad kijiye
Leave a Reply