Karishma-Sazi-E-Dil Dekhta Hun

karishma-sazi-e-dil dekhta huun

tumhen apne muqabil dekhta huun

jahan manzil ka imkan hi nahin hai

vahan asar-e-manzil dekhta huun

sada di tu ne kya jaane kahan se

magar main janib-e-dil dekhta huun

kahan ka rahnuma aur kaisi rahen

jidhar badhta huun manzil dekhta huun

ishara hai tira tufan ki janib

magar main huun ki sahil dekhta huun

mohabbat hi mohabbat hai jahan par

mohabbat ki vo manzil dekhta huun

mire hathon men bhi hai saaz lekin

abhi main rang-e-mahfil dekhta huun

tire hathon se jo tuuta tha ik din

vahi tuuta hua dil dekhta huun

kabhi tufan hi tufan hai nazar men

kabhi sahil hi sahil dekhta huun

ghurur-e-husn-e-batil par nazar hai

niyaz-e-ishq-e-kamil dekhta huun

‘majaz’ aur husn ke qadmon pe sajde

maal-e-zoam-e-batil dekhta huun

Leave a Comment