Hajra Noor Zaryab
sambhale abr-e-karam tu sambhal bhi sakti hai
ye dil ki shaḳh abhi phul-phal bhi sakti hai
bujhao maghribi atish ki baḌh ke chingari
ki is se mashriqi tahzib jal bhi sakti hai
uruuj zarf ki had se nikal na jaa.e kahin
ye shai faraz pe ja kar phisal bhi sakti hai
ham aaj zor mohabbat ka azma.enge
suna hai ruḳh ye hava ka badal bhi sakti hai
ye sard sard hava.en ye chandni ye firaq
tire liye ye tabi.at machal bhi sakti hai
kisi pe marne se pahle mujhe na tha ma.alum
ki aise jiine ki hasrat nikal bhi sakti hai
qadam qadam pe ujalon ka ehtimam karo
ki chalte chalte kahin shaam Dhal bhi sakti hai
kamal-e-zabt ko mere mira ḳhuda rakkhe
ye muflisi mire TukḌon pe pal bhi sakti hai
ḳhulus-e-mehr-o-vafa pyaar aur mohabbat se
badal ke dekhiye duniya badal bhi sakti hai
hari-bhari si ruton men ye Dhal bhi sakti hai
ḳhizan ki zard si rangat badal bhi sakti hai
adab ki shaan banun aarzu ye hai ‘zaryab’
magar ye kya miri hasrat nikal bhi sakti hai
Leave a Reply