mavad kar ke faraham chamakti saḌkon se
saja raha huun ghazal ko na.e ḳhayalon se
chhupi hai un men na jaane kahan ki chiḳh-pukar
buland hote hain naghme jo roz mahlon se
nazar na aa.i kabhi phir vo gaanv ki gori
agarche mil ga.e dehat aa ke shahron se
guzar dete hain umren vo ghup-andheron men
laTak rahe hain jo bijli ke unche khambon se
samundar ab tu unhen aur be-qarar na kar
guzar ke aa.i hain lahren hazar nahron se
tulu hoga abhi koi aftab zarur
dhuan uTha hai sar-e-sham phir charaghon se
‘hazin’ ye sho.ala-e-taban kabhi nahin bujhta
main kyuun hayat ko tashbih duun hababon se
Leave a Reply