Talash

december ke dalan men

is chamakti hui aftabi tamazat ko ruuh men utare

kiran-dar-kiran tum kise dekhti ho

khunuk si havaon ki in sarsarati hui ungliyon men

jo ik lams mahsus karne lagi ho vo kya hai

koi vahima hai? haqiqat hai koii?

ki ik khvab hai jo sar-e-rah aa kar mila hai

shab o roz masrufiyat men ghiri ho

koi kaam bhi ho

use ek lamha nahin bhulti ho!

tumhen kya hua hai

sadak par ravan

apni gaadi men baithi

yahan aati jaati hui gadiyon men

kise dekhti ho

kabhi samna ho

to ankhon men us ki

kise DhunDhti ho?

Leave a Comment