ik iima ik ishara mar raha hai
ufuq par dil ke taara mar raha hai
jo mere baad sab paida hua tha
vo mujh se pahle saara mar raha hai
jise tha phuul kar phatakna hi lazim
sikud kar vo ghubara mar raha hai
kai maujon ne dam toda tha jis par
suna hai vo kinara mar raha hai
khirad tahlil sahra kar rahi hai
junun ka istiara mar raha hai
nazar ki maut ik taaza alamiya
aur itne men nazara mar raha hai
zaman-paima yahi miqyas-e-dil tha
magar ab us ka paara mar raha hai
mujhe zinda thi jis ki na-gavari
vo ab mujh ko gavara mar raha hai
kahan mangi hui sansen kahan dil
jilaya thaa, dobara mar raha hai
Leave a Reply