Nadeem Sirsivi
bayaz-e-kohna men jiddat bhari tahrir rakhni hai
purani niyam men ya.ani na.i shamshir rakhni hai
fasil-e-fikr se girta hua misra.a uThana hai
sirhane ab mujhe har dam kitab-e-‘mir’ rakhni hai
mujhe ta-umr ranj-e-qaid ko mahsus karna hai
mujhe ta-umr apne paas ye zanjir rakhni hai
sajao ḳhvab koi raat ki be-rang ankhon men
agar baaqi dilon men ḳhvahish-e-ta.abir rakhni hai
ḳhudi se be-ḳhudi ki jang hai goya mujhe is pal
muqabil apne hi apni koi tasvir rakhni hai
hamen apne lahu se dasht ik gulzar karna hai
hamen ta-hashr zinda azmat-e-takbir rakhni hai
use duniya ke har gham se mukammal paak to kar lo
agar is dil men buniyad-e-gham-e-shabbir rakhni hai
Leave a Reply