Gumbad-E-Madfan Hai Ya Hai Aasman Baala-E-Sar

gumbad-e-madfan hai ya hai asman bala-e-sar

ye makin rakhte hain sab apne makan bala-e-sar

yuun liye hon hashr men bar-e-garan bala-e-sar

dosh par khum hai gunah ki gathriyan bala-e-sar

chhoti si kashti bana hai asman bala-e-sar

sail-e-ashk is tarah chashm-e-khun-fishan bala-e-sar

zer-e-masjid mai-kada main mai-kade men mast-e-khvab

chaunk utha jab di moazzin ne azaan bala-e-sar

ham hain soe saya-e-gul men nahin itna khayal

ai anadil is tarah shor-e-fughan bala-e-sar

nakhl-e-gul ki tarah divanon se bhi manus hain

lete hain bulbul jagah ai baghban bala-e-sar

ye nirali teri khilqat shama us par husn bhi

ham ne dekhi ek teri hi zaban bala-e-sar

khush kiya yuun baagh men la kar mujhe sayyad ne

shakh ke niche qafas hai ashiyan bala-e-sar

bechte phirte hain mai ham is tarah raste gali

ja-e-khum chhoti si hai mai ki dukan bala-e-sar

rahm kar malik ki main do do farishte bhi lade

aur phir isyan ka bhi bar-e-garan bala-e-sar

pichhe pichhe karvan ke ham thake-mande hain yuun

paanv men chhale hain gard-e-karvan bala-e-sar

paanv ke niche se nikli jaati hai yarab zamin

kha rahe hain chakkar itne asman bala-e-sar

main vo huun mahshar ke pyason ko pilaun tau sahi

hauz-e-kausar hoga ai pir-e-mughan bala-e-sar

atish-e-rang-e-hina-o-zulf-e-pechan dekhiye

aag talvon men lagi nikla dhuan bala-e-sar

lene jaata hai haram se kya kahin tum ko ‘riyaz’

taaq par rakkhi hai botal mehrban bala-e-sar

Leave a Comment