Subh-Dam Roti Jo Teri Bazm Se Jati Hai Shama

Imdad Imam Asar

sub.h-dam roti jo teri bazm se jaati hai sham.a

saaf mere soz-e-gham ka rang dikhlati hai sham.a

jis tarah kaale ke man ke ru-ba-ru gul ho charagh

dekh kar ta.aviz-e-zulf-e-yar bujh jaati hai sham.a

sirf parvana adab se dam-ba-ḳhud rahta nahin

tere ro.ab-e-husn se mahfil men tharrati hai sham.a

gher lete hain tujhe parvane us ko chhoḌ kar

jis men tu ho kab farogh us bazm men paati hai sham.a

karband-e-adl hote hain jo hain raushan-dimagh

bazm men har samt yaksan nuur pahunchati hai sham.a

parda-e-fanus se bahar nahin rakhti qadam

ru-ba-ru tere ruḳh-e-raushan ke sharmati hai sham.a

ja-e-girya sohbat-e-ahle–tamasha hai ‘asar’

hai baja roti hui jo bazm men aati hai sham.a