kab lazzaton ne zehan ka pichha nahin kiya
ye mera hausla tha ki lab va nahin kiya
tajdid-e-irtibat bhi mumkin thi ba.ad men
main ne hi is ravish ko gavara nahin kiya
pahle to ik junun sa arz-e-talab ka tha
jab vo mila to dal ne taqaza nahin kiya
suraj raha jo din men mire ghar se duur duur
phir main ne raat men bhi ujala nahin kiya
kya vahm tha ki khilte hi lab band ho ga.e
kya baat thi ki lafz bhi puura nahin kiya
jab mera ishtiyaq hua zabt-azma
phir us ne apne aap hi parda nahin kiya
main sada-lauh sada-bayan sada-arzu
aur us ne sadgi pe bharosa nahin kiya
main ne bhi chalte chalte kiya tha yunhi saval
kya ho gaya jo aap ne puura nahin kiya
vo kam-nigah tha magar us se chura ke aankh
main ne bhi apne saath kuchh achchha nahin kiya
amrit samajh ke pi liya ‘anjum’ ne zahr-e-gham
lekin tumhare naam ko rusva nahin kiya
Leave a Reply