Hayat Amrohvi
tumhari yaad hai main huun ki zindagi hai yahi
ma.al-e-gham hai yahi hasil-e-ḳhushi hai yahi
adu pe lutf-o-karam aur mujh pe jaur-o-sitam
bata de meri vafaon ki tohfagi hai yahi
tumhari diid se taskin-e-qalb hoti hai
miri nigah ki bas vaj.h-e-tishnagi hai yahi
tire huzur men dhuni rama.e baiTha huun
zamana kuchh bhi kahe apni zindagi hai yahi
kisi ki mad bhari nazron se pi chuka huun ‘hayat’
bata.un kya tumhen bas raz-e-be-ḳhudi hai yahi
Leave a Reply