hijr men ho gaya visal ka kya
ḳhvab hi ban gaya ḳhayal ka kya
ḳhud-numa.i pe ḳhaak Daalo tum
dekhna shakl-e-be-misal ka kya
teri furqat ke din ḳhuda kaaTe
ho rahega kabhi visal ka kya
dil ke dene men uzr kis ko hai
jaan hi de rahe hain maal ka kya
haal us ne hamara puchha hai
puchhna ab hamare haal ka kya
vasl ki iltija pe bigḌe kyuun
sun ke chup ho raho saval ka kya
daur ki ashiqi gunah nahin
dekh lete hain dekh-bhal ka kya
zulf ko kyuun jakaḌ ke bandha hai
us ne bosa liya tha gaal ka kya
aaj tum kyuun malul baiThe ho
vasl din hai mire visal ka kya
jab kaha tum se roz milta huun
hans ke kahne lage ḳhayal ka kya
qaul ke vaqt shart-e-fursat kyuun
daḳhl va.ade men ehtimal ka kya
ranj de kar jo ḳhush ho ai ‘muztar’
us ko sadma mire malal ka kya
Leave a Reply