Meer Hasan
jaan men jaan tabhi qais ke bas aati hai
naqa-e-laila ki jab bang-e-jaras aati hai
saath dekhun huun kisi ke jo kisi dilbar ko
main bhi ji rakhta huun mujh ko bhi havas aati hai
qais o farhad ke rone ki jab aa jaati hai lahar
koh-o-sahra pe ghata ja ke baras aati hai
zindagi hai to khizan ke bhi guzar jaenge din
fasl-e-gul jiton ko phir agle baras aati hai
jab qafas men the to thi yad-e-chaman ham ko ‘hasan’
ab chaman men hain to phir yad-e-qafas aati hai
Leave a Reply