Nabeel Ahmad Nabeel
ik yahi ab mira havala hai
ruuh zaḳhmi hai jism chhala hai
saikḌon baar soch kar main ne
tere sanche men ḳhud ko Dhala hai
khinchne vaala hai asman sar se
hadisa ye bhi hone vaala hai
ik ḳhuda-tars mauj ne mujh ko
sahilon ki taraf uchhala hai
ghalib aa.i havas mohabbat par
arzuon ka rang kaala hai
ik taraf jaam afiyat ke hain
ik taraf zahr ka hi pyala hai
kar-e-duniya ki aarzu ne ‘nabil’
mujh ko sau uljhanon men Daala hai
Leave a Reply