na-fahm kahun main use aisa bhi nahin hai
kya shai hai mohabbat vo samajhta bhi nahin hai
maana ki bahut rabta-e-ishq hai nazuk
ham toḌ saken jis ko vo rishta bhi nahin hai
har shai se juda hai dil-e-barbad ki fitrat
jab tak na ho barbad sanvarta bhi nahin hai
ummid hai vabasta miri abr-e-karam se
aur abr-e-karam hai ki barasta bhi nahin hai
asan nahin is rah-e-mohabbat se guzarna
jis raah men halka sa ujala bhi nahin hai
har vaqt gulistan pe ḳhizan ki hain nigahen
khulte hue phulon ka bharosa bhi nahin hai
hamdardi ahbab ka kya zikr hai ‘sha.ir’
is samt koi dekhne vaala bhi nahin hai
Leave a Reply