tum jo qatil na masiha thahre
na ilaj-e-shab-e-hijran na gham-e-charagaran
na koi dushna-e-pinhan
na kahin khanjar-e-sam-aluda
na qarib-e-rag-e-jan
tum to us ahd ke insan ho jise
vadi-e-marg men jiine ka hunar aata tha
muddaton pahle bhi jab rakht-e-safar bandha tha
haath jab dast-e-dua the apne
paanv zanjir ke halqon se kate jaate the
lafz taqsir the
avaz pe taaziren thiin
tum ne maasum jasarat ki thi
ik tamanna ki ibadat ki thi
pa barahna the tumhare
yahi bosida qaba thi tan par
aur yahi surkh lahu ke dhabbe
jinhen tahrir-e-gul-o-lala kaha tha tum ne
har nazzara pe nazzargi-e-jan tum ko
har gali kucha-e-mahbub nazar aai thi
raat ko zulf se tabir kiya tha tum ne
tum bhala kyuun rasan-o-dar tak aa pahunche ho
tum na mansur na iisa thahre
Leave a Reply