Tariq Naeem
ba-nam-e-ishq yahi ek kaam karte hain
ye zindagi ka safar us ke naam karte hain
ajab nahin dar-o-divar jaise ho jaa.en
ham aise log jo ḳhud se kalam karte hain
ye mah-ru bhi to hote hain ansuon ki tarah
kisi ki aankh men kab ye qayam karte hain
ghazab ki dhuup hai ab ke safar men ham-nafaso
kisi ke saya-e-gesu men shaam karte hain
tumhi ne saath diya zindagi ki rahon men
kitab-e-umr tumhare hi naam karte hain
kuchh is tarah tiri ankhon men ashk hain jaise
shab-e-siyah men sitare ḳhiram karte hain
ajiib log hain ‘tariq-na.im’ shahr ke bhi
ye tir-e-hijr dilon men niyam karte hain
Leave a Reply