Tauseef Tabassum
aa.ina milta to shayad nazar aate ḳhud ko
ab vo hairat hai ki pahron nahin paate ḳhud ko
ashna log jo anjam-e-safar se hote
surat-e-naqsh-e-qadam aap miTate ḳhud ko
ek duniya ko giraftar-e-gham-e-jan dekha
yuun na hota to tamasha nazar aate ḳhud ko
a.ina-rang ka sailab hai payab bahut
aankh milti to ye manzar bhi dikhate ḳhud ko
ab ye dekho ki hamin raah hamin manzil hain
umr-bhar dekh chuke Thokaren khate ḳhud ko
asman shab ko khule dasht ha jhuk aata hai
ḳhushbu uḌti hai ki sahra hain bulate ḳhud ko
kya ajab koi kiran ham-safar-e-ḳhvab mile
ta-sahar le ke chalen niind ke maate ḳhud ko
Leave a Reply