Poet
sahra pe gar junun mujhe laave itaab men
khinchun har ek ḳhaar ko pa-e-hisab men
is barq ki tarah se ki ho vo sahab men
atish di baḳht-e-bad ne mujhe ain aab men
dekhi thi zulf raat kisi ki main ḳhvab men
ab tak hai baal baal mira pech-o-tab men
Tuk ghaur kar tu bu-qalmon ka falak ke Dol
ik rang hai naya hi har ik inqalab men
us shola-ḳhu se kasb-e-hararat kare hai daagh
zarra hai jis ka soz-e-dil-e-aftab men
mai pi jo chahe atish-e-dozaḳh se tu najat
jalta nahin vo uzv jo tar ho sharab men
juun mauj mujh se mujib-e-be-taqati na puchh
ik umr hai ki huun main isi iztirab men
qaazi ḳhabar le mai ko bhi likkha hai vaan mubah
rishvat ka hai javaz tiri jis kitab men
roz-e-shumar go ho mire saath baz-purs
main kya huun aur mere gunah kis hisab men
ye sar-kashi hai utni tanik ma.egi pe kya
jhamka nahin hai bahr agar is sahab men
kya kiije hove chashm miyan teri hi jo kor
zahir hai varna husn vahi har naqab men
naseh na taaza ishq ki main vaz.a ki hai raah
har kuchh kare hai aadmi ahd-e-shabab men
qaa.em hai ye bhi taur koi zindagi ka yaan
guzri tamam umr tiri ḳhur-o-ḳhvab men
‘qa.em’ ho kis tarah se baham shakl-e-iḳhtilat
vo is ghurur-e-naz men ham is hijab men
Leave a Reply