ḳhvab to dekh chuke yaar suhane kitne
ab ye batla ki tire gham hain uThane kitne
phuul khilne bhi na paa.e the ki chupke chupke
gasht karne lage ḳhushbu ke divane kitne
tujh ko malum nahin ek tire dil ke siva
tere jogi hue duniya men Thikane kitne
dhuup is jism ke suraj ki churane ke liye
hijr ki raat tarashe hai bahane kitne
sham.a shab sher shafaq shaam shabab aur sharab
shoḳhi-e-lab ke hain ai ‘hosh’ fasane kitne
Leave a Reply