Mohsin Zaidi
vo maut ka manzar jo tha din raat vahi hai
munh se na kaho surat-e-halat vahi hai
lafzon ke ulaT pher se badlega na matlab
imdad jise kahte ho ḳhairat vahi hai
gul karna charaghon ka to ik khel hai us ka
vazeh hai pas-e-parda-e-zulmat vahi hai
zanjir men mausam ki hain jakḌe hue din raat
sardi vahi garmi vahi barsat vahi hai
ham ne to isi tarah guzare hain shab-o-roz
apne liye har din vahi har raat vahi hai
kuchh mere hi manind hai tarz-e-suḳhan us ka
andaz-e-isharat-o-kinayat vahi hai
donon hi taraf aag barabar ki hai ‘mohsin’
donon hi taraf garmi-e-jazbat vahi hai
Leave a Reply