jab tiri yaad ke rangon se bana li ham ne
dil ki divar pe tasvir saja li ham ne
us ke asbab se nikla hai pareshan kaghaz
baat itni thi magar ḳhuub uchhali ham ne
tum se milne ko sitaron men bhi halchal dekhi
muddaton ba.ad koi faal nikali ham ne
yunhi auron ke liye laḌne chale aa.e ho
kab koi baat tumhari thi jo Taali ham ne
ab jo gulshan men ḳhizaon ki amal-dari hai
fasl-e-gul ki kabhi buniyad na Daali ham ne
ka.i aansu miri a.ankhon men hi tahlil hue
dil men aa.e to phir ik yaad mana li ham ne
Leave a Reply